Proud ate daw ngayon ang beauty queen-turned-actress na si Ariella Arida sa dati n’yang co-host sa Wowowin na si Herlene “Hipon Girl” Budol dahil isa na itong official candidate ng Binibining Pilipinas ngayong taon.
Nang maka-tsikahan nga n’ya ang entertainment press recently sa media conference ng movie nila nina Tony Labrusca at Ivan Padilla na Breath Again, sinabi n’ya na inakala n’yang nagbibiro lang ito nang magtanong ito sa kanya tungkol sa beauty pageant noong kapwa pa sila nasa Wowowin.
“Actually, si Herlene is very close to my heart bilang nakasama ko [s’ya] sa Wowowin. I’m really, really, really proud of her,” panimulang pahayag ni Ariella.
“Actually, parang very random lang nagsabi s’ya sa akin…basta nagkita kami sa studio. Sabi n’ya, ‘Ate, sasali ako ng Binibini. P’wede ba ako?’ Sabi ko, ‘Oo naman, ’no? Basta magtanong ka sa akin kapag may question ka,’” papapatuloy n’ya.
Hindi daw n’ya inakalang desidido pala itong sumali at nagulat na lang s’ya na isa na nga ito sa mga kandidata ng patimpalak this year.
“Since si Herlene mahilig mag-joke, ’di ba? Sabi n’ya nga, ‘Ate, magba-vlog ako.’ Ganyan, ganyan… ‘Ate, mag-gaganito ako...’ So, totoo pala. Nakita ko na lang s’ya [na candidate na]. Hindi naman s’ya nag-text. Nakita ko na lang… ‘Ay, iba.’ In fairness, sobrang nag-bloom s’ya. At masasabi natin ang ganda nang [in-improve] ni mommy, ’di ba?’” pa-beking dagdag tsika niya.
Thus, hindi siya naniniwalang Hipon Girl si Herlene.
“Susko, ngayon pa ba?” proud na say niya sa kaibigan. “Kita mo naman...but in way, nakatulong sa kanya ’yon na tinawag siyang gano’n.”
Naniniwala si Ara na kering-keri na ni Herlene ang mag-project. However, nabangit daw nito sa kanya noon na problemado daw ang dalaga sa question and answer portion kung sakali.
“Sabi n’ya nga, ‘Kaso ang problema ko Q & A.’ Sabi ko, ‘Alam mo okey lang ’yan. Be yourself. Basta may tanong ka nandito lang naman ako,’” pagpi-presinta pa ng Miss Universe Philippines 2013.
Kaya naman kung may maipapayo daw s’ya sa False Positive co-star, iyon daw ay huwag magpadala sa mga negatibong sinasabi ng ibang tao.
“’Wag ka mai-intimidate. ’Wag ka ring papadala…don’t let people label you as such kasi ayon ’yong magpapa-down ng confidence mo, e. Kasi nangyari din naman sa akin ’yon. Naniwala ako sa sinasabi sa akin ng mga tao. Towards the end, sarili mo ’yong paniwalaan mo,” aniya.
Dagdag pa n’ya: “And mag-practice ka nang mag-practice nang mag-practice dahil doon ka huhugot ng lakas ng loob at confidence.”
Sa tingin kaya n’ya ay may pag-asa si Herlene na manalo ng korona?
“Oo,” mabilis na sagot ni Ariella. “Sabi ko nga, ‘Girl, kung ako sa’yo…gusto kong mag-Grand International ka. Tutal naman, ang peg doon talagang ikaw na ikaw. Feeling ko ilalaban mo ’tong Pilipinas. At saka maloloka sa’yo si Angkol [Nawat Itsaragrisil]. Itodo na natin.”
(Si Nawat Itsaragrisil ang Thai founder at president ng Thailand-based Miss Grand International Organization.)
“Actually, gusto ko ng [Miss] Grand pero kung gusto n’ya ng [Miss] International, why not? Push din naman tayo. But any title will do kasi, girl, title ’yan. Tapos Binibini pa ’yan. Korona pa rin ’yan,” pagtatapos ni Ariella.
YOU MAY ALSO LIKE:
Maine Mendoza meets Hipon Girl Herlene Budol; says "sobrang kwela siya talaga, nakakaaliw!"
FOLLOW US ONLINE:
Facebook: facebook.com/pikapikashowbiz
Twitter: twitter.com/pikapikaph
Instagram: instagram.com/pikapikaph/
YouTube: youtube.com/pikapikashowbiz
TikTok: https://vt.tiktok.com/ZGJBapkV4/
and join our Viber Community: tinyurl.com/PikaViber
